Google Карталардын аяккы колдонуучусуна тиешелүү кошумча тейлөө шарттары

Акыркы жолу өзгөртүлгөн күн: 2025-жылдын 4-июну

Google Карталарды же Google Карталар платформасынын кызматтарын бириктирген үчүнчү тараптын өнүмдөрүн же кызматтарын колдонуу менен, сиз аяккы колдонуучу катары (1) Google'дун Тейлөө шарттарын, (2) Google Карталардын ушул кошумча тейлөө шарттарын ("Карталардын кошумча шарттарын") кабыл алышыңыз керек. Карталардын Кошумча шарттарында Google Карталар/Google Жер жана Google Карталар/Google Жер API'лери үчүн юридикалык билдирүүлөр шилтеме аркылуу кыстарылган.

Бул документтердин баарын көңүл коюп окуп чыгыңыз. Эки документ биригип, "Шарттар" деп аталат. Анда кызматтарыбызды пайдалануу эрежелери жана Google'дун укук жана милдеттери жазылган.

Компанияңыздын профилин тескөө үчүн Google Карталардагы сатуучуларга арналган функцияларды колдонсоңуз, https://support.google.com/business/answer/9292476 Google'дагы компаниянын профилинин шарттары колдонулат.

Купуялык эрежелерибиз менен таанышып чыгууну сунуштайбыз. Анда кандай маалыматты, кандай максатта топтоп, колдонорубуз, ошондой эле аны кантип өзгөртүп, экспорттоп же өчүрө турганыңыз түшүндүрүлөт.

1. Уруксаттама. Бул Шарттарды аткарсаңыз, Google'дун Тейлөө шарттарына ылайык Google Карталарды анын ичинде төмөнкү функцияларды колдонууга уруксаттама аласыз:

   1. карталарды көрүү жана белгилөө;

   2. KML файлдарын жана картанын катмарларын түзүү;

   3. туура аныкталган контентти онлайн режиминде, видеодо жана басылмада жалпыга ачык көрсөтүү.

2. Google Карталарда белгилүү бир аракеттерди аткарууга уруксаттарыңызды көрүү үчүнGoogle Карталарды, Google Жерди жана Көчөлөрдү кыдырууну колдонуунун уруксаттар баракчасына өтүңүз.

3. Тыюу салынган аракеттер. 2-бөлүмдөгү жобону аткаруу менен, Google Карталарды колдонууга уруксаттама аласыз. Google Карталарды төмөнкү максатта колдонууга тыюу салынат:

   1. Google Карталардын кандайдыр бир бөлүгүн таратуу же сатуу же Google Карталардын негизинде жаңы өнүм түзүү же кызмат көрсөтүү;

   2. контентти көчүрүү (эгер Google Карталарды, Google Жерди жана Көчөлөрдү кыдырууну колдонуунун уруксаттар баракчасына же тиешелүү интеллектуалдык менчик жөнүндө мыйзамынын, анын ичинде "ак ниет пайдаланууга" ылайык сизге атайын уруксат берилбесе);

   3. жапырт жүктөп алуу же контенттин дүңүнөн түрмөгүн түзүү (же кимдир бирөөгө мындай аракеттерди аткарууга уруксат берүү);

   4. Google Карталарды колдонуп, башка картага тиешелүү маалымат базасын түзүү же толуктоо (мисалы, картага түшүрүү же чабыттоо маалымат базасын, ишканалар тизмеси, почта же телемаркетинг тизмеси) үчүн, Google Карталарга окшош же аны алмаштыра турган кызматты түзүү; же

   5. Google Карталарды Android Auto сыяктуу Google атайын киргизген функциялардан сырткары, башка адамдардын өнүмдөрү же кызматтары менен анык убакыттагы чабыттоо же унааны автономдук түрдө көзөмөлдөө үчүн колдонуу.

4. Чыныгы шарттар; Тобокелдикти кабыл алуу. Google Карталардын/Google Жердин, жол кыймылынын маалыматын, багыттарды жана башка контентти колдонгондо, алар чыныгы шарттардан айырмаланып турганын байкашыңыз мүмкүн, андыктан Google Карталарды өзүңүз баамдап колдонуңуз. Өзүңүздүн жүрүм-турумуңузга жана келип чыккан натыйжага өзүңүз гана жооптуусуз.

5. Google Карталардагы контентиңиз Google Карталар/Google Жер аркылуу жүктөп берген, тапшырган, сактаган же алган контент Google'дун Тейлөө шарттарына, анын ичинде "Контентиңизди колдонууга уруксат берүү" деп аталган бөлүмдөгү уруксаттаманын талаптарына жооп бериши керек. Ал эми түзмөгүңүздө гана сакталган (мисалы, KML файлы), Google'га жүктөлбөгөн же тапшырылбаган мазмун бул уруксаттамадагы жоопкерчиликтен бошотулат.

6. Мамлекеттик аяккы колдонуучулар. Эгер Google Карталарды мамлекеттик мекеменин өкүлү катары колдонуп жатсаңыз, төмөнкү шарттар колдонулат:

   1. Негизги мыйзам.

      1. Кошмо Штаттардагы жана Европа Биримдигиндеги шаардык жана өкмөттүк уюмдар үчүн Google'дун Тейлөө шарттарындагы негизги мыйзамдын беренелери колдонулбайт.

      2. Кошмо Штаттарынын федералдык өкмөттүк уюмдары үчүн Google'дун Тейлөө шарттарындагы негизги мыйзам тууралуу бөлүм толугу менен төмөнкүгө алмаштырылат:

         “Бул Келишим эл аралык жеке укукту эске албаганда, Америка Кошмо Штаттарынын мыйзамдары тарабынан башкарылып, чечмеленип жана ишке ашырылат. Федералдык мыйзамдын чегинде гана: (A) Тийиштүү федералдык мыйзам камсыздалбаган учурда Калифорния штатынын (Калифорниянын мыйзам ченемине ылайык келбеген учурлардан тышкары убакта) мыйзамы колдонулат жана (Б) ушул шарттар же Google Карталар боюнча келип чыккан талаштар Санта-Клара аймагынын, Калифорния, федералдык сотунда каралып, тараптар жеке жоопкерчиликке тартылышат."

   2. АКШ өкмөтүнүн чектелген укуктары. Google Карталарды/Google Жерди Кошмо Штаттарынын федералдык өкмөт тарабынан же өкмөт үчүн колдонулушу Google Карталардын юридикалык жоболорундагы "АКШ Өкмөтүнүн чектелген укуктары" бөлүмү тарабынан ишке ашырылат.