Píramídarnir í Giza eru einhver elstu og áhrifamestu mannvirki jarðarinnar. Þeir voru byggðir fyrir þúsundum ára og standa uppi sem vitnisburður um verkfræðiafrek fyrri kynslóða. Ferðastu um tímann og kannaðu þessi undur fornaldar.

Píramídi er form með þríhyrndum hliðum sem mætast í tindi efst. Finna má fleiri en 100 píramída í Egyptalandi sem flestir hverjir voru reistir sem grafhýsi konunga. Engir þeirra eru þó jafnauðþekkjanlegir og píramídarnir í Giza. Píramída er einnig að finna í öðrum heimshlutum, þar á meðal á Ítalíu, Indlandi og í Mexíkó.

Píramídarnir í Giza voru reistir fyrir 4500 árum í valdatíð fjórðu konungaættarinnar, á gullöld Egyptalands. Rúmlega 85 ár tók að byggja þá og um það sáu þrjár kynslóðir faraóa; Keops, Kefren, sonur hans, og sonarsonurinn Mýkerínos. Þrír minni drottningarpíramídar standa meðfram grafhýsunum.

Píramídinn mikli, sem Keops lét reisa, var fyrsti og stærsti píramídinn í Giza. Hann er 139 metrar á hæð og var hæsta mannvirki heims um næstum 4000 ára skeið. Píramídinn kallast á við höfuðáttirnar og snýr næstum fullkomlega í hánorður, sem er ótrúlegt byggingarfræðilegt afrek.Við hlið Píramídans mikla stendur Keops-skipið, fullkomlega varðveitt sólarskip sem ætlað var að ferja faraóinn til framhaldslífsins.
Kanna þennan stað

Píramídi Kefrens hefur hvítan topp og viðist vera sá stærsti af píramídunum þremur. Í raun var hann hins vegar byggður á hærri berggrunni til að virðast stærri. Þótt ótrúlegt megi virðast má rekja samhverfar hliðar og endurtekin horn þessa píramída til notkunar einfaldra verkfæra á borð við mælistikur og blýlóð.

Kanna þennan stað

Sfinxinn mikli er höggmynd úr kalksteini af því sem er líklega höfuð Kefrens á búk ljóns. Sfinxinn er goðsagnavera sem faraóar töldu að gætu komið þeim í mjúkinn hjá sólarguðinum í framhaldslífinu. Um aldir var Sfinxinn mikli að mestu grafinn í kvikan sand eyðimerkurinnar en hefur í dag verið grafinn upp að fullu.
Kanna þennan stað

Þriðji og minnsti píramídinn í Giza er grafhýsi Mýkerínosar sem stendur syðst á svæðinu. Mýkerínos hefur verið uppspretta bæði magnaðra dýrgripa og vonbrigða á sviði fornleifafræði. Fyrst kom í ljós að mannabein sem fundust í grafhýsinu komu annars staðar frá og síðan fórst steinkista úr píramídanum í skipsskaða.
Kanna þennan stað

Enginn veit fyrir víst hvernig þetta forna samfélag fór að því að byggja svona stórbrotna minnisvarða. Bygging píramídanna fól í sér flutning gríðarstórra steinblokka til Giza-svæðisins og síðan notkun rampa, trissa og vogarstanga til að stafla þeim með fullkominni nákvæmni. Tugir þúsunda launaðra verkamanna (ekki þræla) reistu píramídana miklu, sem eru tæknilega mun háþróaðri en eldri þrepapíramídar.

Eftir andlát faraós tók 70 daga að smyrja líkið, sem meðal annars fól í sér að fjarlægja heila og innri líffæri. Múmían var þá „endurlífguð“ eftir kúnstarinnar reglum, þar á meðal í trúarathöfninni „opnun munnsins“ sem ætlað var að gera faraó kleift að anda og tala í framhaldslífinu. Múmíunni var síðan komið fyrir í viðarkistu og loks voldugri steinkistu. Sumar múmíur báru grímur, líkt og þetta mun yngra dæmi um grímu Tútankamons frá Google Cultural Institute sýnir.

Píramídarnir voru reistir í útjaðri gömlu höfuðborgarinnar, Memfis, og standa nú í stuttri akstursfjarlægð frá núverandi höfuðborg Egyptalands, Kaíró. Þótt þetta sé hentugt fyrir ferðamenn hefur nálægð þeirra við þessa sívaxandi borg haft í för með sér nýjar áskoranir, til dæmis hávaða-, ljós- og loftmengun.