Isang protektadong dako ang Samburu National Reserve sa Northern Kenya, mga 6 na oras ang layo mula sa Nairobi, ang kapital. Ang topograpiya ng reserve ay kinabibilangan ng mayabong na kagubatang rivervine, tuyo at malawak na mga savannah, gayundin ng kilu-kilong mga bundok. Ang kahabaan ng Ewaso Nyiro River ay nasa tabi ng Katimugang hangganan ng reserve at siyang pinakamahalagang yaman sa dakong ito, na mapagkukunan ng tubig para sa mga tao, halaman at hayop.

Napakasukal na dako ng Samburu para sa wildlife, dahil sa mainit, tuyong lupain ng savannah nito, kilu-kilong lupain at kalapit na ilog. Ang Pebrero at Marso ang pinakamaiinit na buwan na sinusundan ng dalawang maulan na panahon sa buong taon. Puno ng mga dune palm grove ang tuyot na lupain, at sa malayo ay makikita mo ang hugis ng mga bundok ng Koitogor at Ololokwe.

Pumupunta ang mga bisita sa Samburu upang makakita ng mga elepante gayundin ng mga leopardo, leon, giraffe at mahigit sa 450 uri ng ibon. Natatangi sa dakong ito, matutukoy ang mga Grevy na zebra sa pamamagitan ng kanilang maninipis na guhit sa katawan, malalaking bilog na tainga at malalaking katawan. Sa isang game drive, maaari kang makakita ng mga Somali ostrich, Nile crocodile at malalaking kawan ng oryx, kung saan ang lahat ng ito ay sanay sa disyerto at mas gusto ang maiinit na kapaligiran tulad nito. I-explore ang lugar na ito.

Ang Samburu ay kilala dahil sa pagkakaroon ng isa sa pinakamahuhusay na napag-aralang populasyon ng mga elepante sa mundo. Dahil sa 20 taon nang pagsasaliksik, lubhang nagtitiwala at agad na lumalapit sa mga sasakyan ang mga lokal na elepante, lalo na sa isang truck sa pagsasaliksik ng Save the Elephants. Ang mga elepante ay may mga natatanging memorya ng kapaligiran at nauunawaan nila ang mga hangganan ng Samburu Reserve, kaya madaling mapapansing mas nagiging kalmado sila kapag nasa pinoprotektahang lugar sila. I-explore ang lugar na ito.

Mahalagang papel ang ginagampanan ng mga elepante bilang mga inhinyero ng lupain ng kapaligirang ito. Tumutulong sila sa pagpapakalat ng mga binhi sa pamamagitan ng pagkain ng mga prutas mula sa mga puno at pagpapakalat ng mga binhi sa pamamagitan ng kanilang dumi. Pinipilas ng mga elepante ang mga ubak sa mga puno na pumipigil sa di-kinakailangang pagkapal ng mga halaman, at ito ay nagiging daan sa muling pagtubo at mas malalim na pagpupunla ng binhi. Sa panahon ng tagtuyot, naghuhukay ang mga ito ng butas para maghanap ng tubig na pagkatapos ay magagamit naman ng ibang mga hayop. Ang mga elepante ay may napakahalagang tulong sa lupain.

Itinatag noong 1993, layunin ng Save the Elephants na tiyaking magkakaroon ng hinaharap ang mga elepante at mapanatili ang integridad ng ekolohiya ng mga lugar kung saan naninirahan ang mga ito. Nakabase sa Nairobi, kumikilos ang STE sa buong Africa upang maunawaan at maprotektahan ang mga elepante. Ang kanilang pangunahing kampo sa pagsasaliksik ay nasa Samburu, kung saan sinusubaybayan nila ang mga elepante mula sa lupa, sa himpapawid at sa pamamagitan ng GPS tracking. Nakatutok sila sa pagsasaliksik bilang saligan ng pagpaplano at pagpapasya para sa paggawa ng mga patakaran, at nagsisikap upang mas mapaganda ang relasyon sa pagitan ng mga tao at elepante. I-explore ang lugar na ito.

Noong dekada 1960, sinimulan ng isang biologist na nagngangalang Iain Douglas-Hamilton ang unang pagsasaliksik sa gawi ng mga elepante sa ilang sa Tanzania, gamit ang isang magaang aircraft upang subaybayan at bilangin ang mga ito. Noong 1993, itinatag niya ang Save the Elephants, at kalaunan ay pinili niya ang mga natatanging maamo at nagtitiwalang elepante ng Samburu bilang paksa para sa isang bagong pangmatagalang pag-aaral ng elepante. Sa pamamagitan ng pagsasaliksik na isinasagawa sa Samburu, nalalaman ng buong mundo ang mga banta sa kaligtasan ng mga elepante at nakakagawa ng mga solusyon upang matiyak na magkakaroon ng hinaharap ang species.

Hindi lamang mga pagsi-survey mula sa himpapawid ang isinasagawa ng Save the Elephants kungdi, sinusubaybayan din nila ang mga indibidwal na elepante sa pamamagitan ng mga GPS collar. Sa pamamagitan ng mabilis na pagpapatulog sa isang elepante, nilalagyan ng mga beterinaryo ng collar ang leeg ng mga ito upang i-track ang lokasyon ng elepante. Nakakatulong ang data na ito upang maunawaan ng mga tagapagsaliksik kung paano kumikilos ang mga hayop na ito sa buong lupain, pati na rin ang pagsubaybay sa buhay ng ilang elepante. Sa pamamagitan ng pagsusuri sa GPS data, nakakatanggap din ang Save the Elephants ng mga awtomatikong alerto ng pagtigil ng kilos kapag tumigil sa pagkilos ang isang elepante. Hanggang ngayon, 266 na elepante sa buong Africa ang nalagyan na ng collar ng STE.

Nangongolekta ang Save the Elephants ng napakaraming data mula sa mga GPS collar ng mga elepante ngunit kinailangan nila ng paraan upang makita ito. Noong 2006, sinimulan nilang i-overlay ang kanilang data sa paglalagay ng collar sa detalyadong digital landscape ng Google Earth, na nagbigay-daan sa mas mahusay na pagta-track ng mga pagkilos ng mga elepante. Ginagamit na nila ngayon ang mahusay na kakayahan sa computing ng Google Earth Engine upang suriin ang mahigit sa limang milyong naitalang lokasyon na kinuha mula sa 266 na elepante sa lampas 17 taon.

Naglalakbay ang mga elepante sa buong lupain at madalas na nakakasagupa ng mga daan, bahay, sakahan at mga tao. Ang problema sa pagitan ng mga tao at elepante ay isang mabigat na isyu sa proteksyon ng mga elepante, at ang isang paraan upang mapanatiling ligtas ang mga elepante ay bigyan ang mga ito ng ligtas na madadaanan. Hango sa ideya ng data ng pagsubaybay sa mga elepante, itinayo ang underpass na ito upang ligtas na makapaglakbay ang mga elepante sa ilalim ng highway na ito na maraming tao at sasakyan. I-explore ang lugar na ito.

Ang ilegal na pangangaso ang pinakamabigat na panganib sa kaligtasan ng mga elepante ng Africa. Ang mga elepante ay pinapatay para sa ivory na nasa kanilang mga tusk, na pagkatapos ay ibinebenta sa buong mundo. Ang pagpatay sa mga mas matatandang elepante ay may malubhang epekto sa mga istraktura ng pamilya, at maraming batang elepante ang nauulila dahil dito. Ang paglaban sa ilegal na pangangaso ay hindi lamang nangangailangan ng mahigpit na mga parusa upang mapigilan ang mga ilegal na mangangaso kungdi, kailangan dimabawasan ang pangangailangan ng consumer para sa mga produktong gawa sa ivory.

Ang pagkamatay ng isang elepante ay isang pangkulturang kawalan para sa mga mamamayan ng Samburu. Niyayanig ng ilegal na pangangaso ang mga buhay ng mga taong namumuhay na kasama ng mga elepante habang gumagala sa lupain ang mga trabahador na naghahanap ng ivory. Hinihikayat ng The Northern Rangelands Trust ang mga taong taga-roon upang matutong mangalaga at gawing ligtas na lugar ang lupain at gumawa ng mga oportunidad para sa ekonomiya sa pamamagitan ng turismo, na mas makakapagpakita sa kahalagahan ng mga elepante sa Samburu.

Ang mga ranger na ito ay nangunguna sa pakikilaban sa ilegal na pangangaso, isinusugal ang kanilang mga buhay upang ipagtanggol ang mga elepante ng Kenya. Nakakatanggap sila ng mga tip mula sa mga taong taga-roon at sa mga organisasyon at pagkatapos ay sinusuyod ang lupain kasama ng mga sinanay na aso upang maghanap ng mga ilegal na aktibidad. Ang naparangalang pagsisikap ng Lewa Wildlife Conservancy at ng Kenya Wildlife Service ay nakatulong sa pagpapababa ng bilang ng mga elepanteng biktima ng ilegal na pangangaso sa Northern Kenya nang mas mababa sa 1% ng pangkalahatang populasyon, isang napakalaking tagumpay sa pakikibaka upang maipagtanggol ang mga elepante.

Kapag napatay dahil sa ilegal na pangangaso ang isang elepante, ano ang mangyayari sa mga anak nito? Itinatag noong 1977, ang The David Sheldrick Wildlife Trust ay nagbibigay ng tulong sa mga hayop na nangangailangan nito, kabilang na ang mga ulila. Sa kanilang ampunan ng elepante sa Nairobi, pinapakain at tinutulungang mag-ehersisyo ng mga tagapag-alaga ang mga elepante, at tinitiyak na masanay makihalubilo ang mga ito sa kawan ng mga ulila. Napakahalaga ng ganitong uri ng pag-aalaga sa pagpapalaki ng malulusog na elepante na maaaring maibalik sa ilang. Manu-manong nagpalaki ang Sheldrick Trust ng mahigit sa 180 sanggol na elepante. I-explore ang lugar na ito.

Noong 2012, unang hiniling ng STE na dalhin ang Street View Trekker sa Samburu upang makakuha ng 360-degree na panoramic na koleksyon ng imahe ng mga elepante sa ilang. Bagama't hindi lahat ay makakabisita sa Samburu, maaaring makaranas ng online na safari ang sinuman upang makita ang mga elepanteng ito. Sa pamamagitan ng pagpapadali para sa mga tao na makita ang mga elepante online, umaasa ang mga mananaliksik at tagapagtaguyod na mas mapapalapit ang mga tao sa mga elepante at lalo silang masasabik na makatulong sa pagtiyak sa hinaharap ng mga ito.